நானா படேகர் காலமானார்: 'காலா'வில் ரஜினிக்கு வில்லனாக நடித்தவரின் திரைப் பயணம்

ரஜினிகாந்தின் 'காலா' திரைப்படத்தில் அவருக்கு எதிராக அதிகாரமும் அரசியலும் கலந்த ஹரி தாதா கதாபாத்திரத்தில் நடித்ததன் மூலம் தமிழ் ரசிகர்களிடம் பரவலாக அறிமுகமான மூத்த நடிகர் நானா படேகர், 75 வயதில் கோவாவில் காலமானார்.

இதுவரை கிடைத்துள்ள தகவல்களின்படி, இன்று அதிகாலை அவரது இல்லத்தில் ஏற்பட்ட திடீர் இதய பாதிப்பைத் தொடர்ந்து நானா படேகர் உயிரிழந்தார்.

பிபிசி மராத்தி, அவரது மகன் மல்ஹார் படேகரை தொடர்புகொண்டு பேசியது. நானா படேகர் கோவாவில் உயிரிழந்ததாக மல்ஹார் படேகர் உறுதிப்படுத்தினார்.

"இந்தத் துயரமான செய்தி உண்மைதான்" என்று அவர் கூறினார்.

ஏஎன்ஐ செய்தி முகமை வெளியிட்ட தகவலின்படி, "45 நிமிடங்கள் தொடர்ந்து சிபிஆர் சிகிச்சை அளித்தும் அவரைக் காப்பாற்ற முடியவில்லை. இது தொடர்பாக 'மெடிகோ-லீகல் கேஸ்' பதிவு செய்யப்பட்டுள்ளது. உடற்கூராய்வு செய்யப்படும்" என்று மணிப்பால் மருத்துவமனையின் புற்றுநோயியல் துறைத் தலைவர் மருத்துவர் சேகர் சால்கர் தெரிவித்தார்.

'காலா'வின் ஹரி தாதா

ஹிந்தி மற்றும் மராத்தி திரையுலகில் பல தசாப்தங்களாக முக்கிய நடிகராக இருந்த நானா படேகரை தமிழ் ரசிகர்களிடம் நெருக்கமாகக் கொண்டு வந்த படங்களில் முக்கியமானது பா.ரஞ்சித் இயக்கிய 'காலா'.

2018ஆம் ஆண்டு வெளியான அந்தப் படத்தில், ரஜினிகாந்த் நடித்த கரிகாலனுக்கு எதிராக ஹரி தாதா என்ற சக்திவாய்ந்த அரசியல் கதாபாத்திரத்தில் நானா படேகர் நடித்திருந்தார்.

ஆனால், அதற்கு பத்து ஆண்டுகளுக்கு முன்பே அவர் தமிழ்த் திரையுலகில் அறிமுகமாகியிருந்தார். பாரதிராஜா இயக்கத்தில் 2008ஆம் ஆண்டு வெளியான 'பொம்மலாட்டம்' திரைப்படத்தில் நானா படேகர் முக்கிய கதாபாத்திரத்தில் நடித்திருந்தார்.

அவரது மறைவுக்குப் பிறகு 'காலா'வில் இணைந்து நடித்த ரஜினிகாந்த், நானா படேகரை தனது நண்பராக நினைவுகூர்ந்துள்ளார்.

"என் அன்பு நண்பர் நானாஜி இனி நம்முடன் இல்லை என்பதை என்னால் நம்பவே முடியவில்லை. அவரது குடும்பத்தினருக்கும் அன்புக்குரியவர்களுக்கும் என் ஆழ்ந்த இரங்கலைத் தெரிவித்துக் கொள்கிறேன். அவரது ஆன்மா சாந்தியடையட்டும்" என்று ரஜினிகாந்த் தெரிவித்துள்ளார்.

திரைப்பட நடிகரும் இயக்குநருமான பிரபுதேவாவும் நானா படேகரின் மறைவுக்கு இரங்கல் தெரிவித்துள்ளார்.

"பழம்பெரும் நடிகர் நானா படேகரின் மறைவால் மிகவும் வேதனை அடைந்துள்ளேன். அவரது ஆற்றல் மிகுந்த நடிப்பு, குறிப்பிடத்தக்க திறமை மற்றும் இந்திய திரையுலகிற்கு அவரின் மகத்தான பங்களிப்பு ஆகியவை எப்போதும் நினைவுகூரப்படும்" என்று அவர் தனது எக்ஸ் பக்கத்தில் பதிவிட்டுள்ளார்.

நடிகர் பிரகாஷ் ராஜின் இரங்கல் பதிவு, நானா படேகருடனான அவரது தனிப்பட்ட நட்பையும் வெளிப்படுத்தியது.

"என் அன்புக்குரிய நானா ஜி... உங்களை மிகவும் மிஸ் செய்கிறேன். உங்களுடன் கழித்த தருணங்கள், உரையாடல்கள், வாக்குவாதங்கள், நீங்கள் சமைத்த உணவு, நீங்கள் பகிர்ந்துகொண்ட அறிவு என அனைத்தையும் என்றும் நினைவில் போற்றிப் பாதுகாப்பேன். என் வாழ்க்கைப் பயணத்தில் நீங்கள் வந்ததற்கு நன்றி" என்று அவர் பதிவிட்டுள்ளார்.

பொம்மலாட்டம் படத்தில் நடிகர் நானா படேகருக்கு தமிழில் குரல் கொடுத்தவரான நடிகர் நிழல்கள் ரவி பிபிசி தமிழிடம் பேசினார். அப்போது அவர், " எங்கள் முதல் சந்திப்பு ஆப்ரிக்காவில் உள்ள ஜிம்பாப்வேவில் நடந்தது. கிழக்கு ஆப்ரிக்காவில் ஷிலா என்ற படத்திற்காக நாங்கள் அங்கு சென்றிருந்தோம். அப்படத்தின் தமிழ் பதிப்பில் நானும் இந்தி பதிப்பில் நானா படேகரும் நடித்திருந்தோம். நாங்கள் பார்க்க சகோதரர்கள் போல் இருப்பதாக படத்தின் இயக்குநர் கூறுவார். நடிகர் சத்தியராஜும் இதனை பல முறை கூறியுள்ளார்.

நானா படேகர் நல்ல நடிகர் என்பதைத் தாண்டி மிக சிறந்த நபர், சமூக சீர்திருத்த கருத்துகளை பேசுபவர், விவசாயிகளுக்காக நிறைய செய்துள்ளார்." என்றார்.

பட மூலாதாரம், Getty Images

கம்பீரமான குரல், தீவிரமான நடிப்பு

நானா படேகரின் இயற்பெயர் விஸ்வநாத் படேகர். நாடக மேடையில் தொடங்கிய அவரது நடிப்புப் பயணம், 1978ஆம் ஆண்டு வெளியான 'கமன்' திரைப்படத்தின் மூலம் சினிமாவை எட்டியது.

கதாநாயகனாக மட்டுமின்றி, வில்லன், குணச்சித்திர நடிகர், நகைச்சுவை நடிகர் என ஒரே மாதிரியான கதாபாத்திரங்களுக்குள் தன்னை அடைத்துக்கொள்ளாமல் வெவ்வேறு பாத்திரங்களில் நடித்தது அவரது திரைப் பயணத்தின் தனித்துவங்களில் ஒன்று.

குறிப்பாக அவரது கம்பீரமான குரல், வேகமான மற்றும் அழுத்தமான வசன உச்சரிப்பு, கோபத்தையும் மன அழுத்தத்தையும் வெளிப்படுத்தும் நடிப்பு ஆகியவை அவருக்கென ஒரு தனித்துவமான திரை அடையாளத்தை உருவாக்கின.

'பரிந்தா', 'கிராந்திவீர்', 'அக்னி சாக்ஷி', 'காமோஷி: தி மியூசிக்கல்', 'அப் தக் சப்பன்' உள்ளிட்ட திரைப்படங்களில் அவரது தீவிரமான நடிப்பு பரவலாகப் பாராட்டப்பட்டது.

அதே நேரத்தில், 2007ஆம் ஆண்டு வெளியான 'வெல்கம்' திரைப்படத்தில் கேங்ஸ்டர் உதய் ஷெட்டியாக நடித்தபோது, அதுவரை தீவிரமான கதாபாத்திரங்களுக்காக அதிகம் அறியப்பட்ட நானா படேகரின் நகைச்சுவை நடிப்பும் பெரும் வரவேற்பைப் பெற்றது.

இதன் தொடர்ச்சியாக 2015ஆம் ஆண்டு வெளியான 'வெல்கம் பேக்' திரைப்படத்திலும் அதே கதாபாத்திரத்தில் அவர் நடித்தார்.

2010ஆம் ஆண்டு வெளியான அரசியல் த்ரில்லர் 'ராஜ்நீதி', 'அபஹரண்', 'டாக்ஸி நம்பர் 9211' உள்ளிட்ட படங்களிலும் அவரது நடிப்பு கவனம் பெற்றது.

நடிப்புடன் இயக்கத்திலும் ஈடுபட்ட நானா படேகர், 'பிரஹார்: தி ஃபைனல் அட்டாக்' திரைப்படத்தை இயக்கியிருந்தார்.

சினிமா மற்றும் கலைத் துறைகளில் அவர் ஆற்றிய பங்களிப்புக்காக 2013ஆம் ஆண்டு இந்திய அரசு அவருக்கு பத்மஸ்ரீ விருது வழங்கியது.

கடைசி ஆண்டுகளிலும் தொடர்ந்த நடிப்பு

75 வயதிலும் நானா படேகர் தொடர்ந்து திரைப்படங்கள் மற்றும் தொடர்களில் நடித்து வந்தார்.

2026ஆம் ஆண்டு விஷால் பரத்வாஜ் இயக்கத்தில் வெளியான 'ஓ'ரோமியோ' திரைப்படத்தில் ஷாகித் கபூர், திரிப்தி டிம்ரி ஆகியோருடன் நடித்தார். அதில் மும்பை காவல்துறையின் உளவுப் பிரிவுடன் தொடர்புடைய இஸ்மாயில் கான் என்ற கதாபாத்திரத்தில் அவர் நடித்திருந்தார்.

அனில் கபூர் நடித்த 'சுபேதார்' திரைப்படத்திலும் நானா படேகர் நடித்திருந்தார். அந்தப் படம் 2026ஆம் ஆண்டு மார்ச் மாதம் பிரைம் வீடியோவில் வெளியானது.

அதற்கு முன்பு 'ஹவுஸ்ஃபுல் 5' மற்றும் 'வன்வாஸ்' ஆகிய திரைப்படங்களிலும் அவர் நடித்திருந்தார்.

2026ஆம் ஆண்டில் பிரகாஷ் ஜாவின் அரசியல் நாடகத் தொடரான 'சங்கல்ப்' மூலம் இணையத் தொடரிலும் அவர் முக்கிய கதாபாத்திரத்தில் நடித்தார்.

நாற்பது ஆண்டுகளுக்கும் மேலாக நீண்ட அவரது திரைப் பயணம், ஹிந்தி மற்றும் மராத்தி சினிமாவுடன் மட்டும் நின்றுவிடாமல் தமிழ் உள்ளிட்ட பிற மொழிகளுக்கும் விரிந்தது.

பட மூலாதாரம், Facebook/Nana Patekar

"நேற்றுதான் அவரிடம் பேசினேன்"

நானா படேகருடன் நீண்டகால நட்பு கொண்டிருந்த மூத்த பத்திரிகையாளர் ராஜ்தீப் சர்தேசாய், அவரது மறைவுக்குப் பிறகு வெளியிட்ட பதிவு தனிப்பட்ட நினைவுகளைப் பகிர்வதாக அமைந்தது.

"சிறந்த நடிகர், அனைத்துக்கும் மேலாக அன்பான நண்பர். நானா படேகர் இனி இல்லை. சற்று முன்புதான் கோவாவில் அவர் காலமானார். நேற்றுதான் அவரிடம் பேசினேன். அவரது கடைசி வார்த்தைகள் 'கால்ஜி கே ராஜா' - 'உன்னைப் பார்த்துக்கொள், ராஜா' என்பதாக இருந்தது" என்று அவர் பதிவிட்டுள்ளார்.

"திரையிலும் திரைக்கு வெளியிலும் உங்களை நான் மிகவும் மிஸ் செய்வேன், நானா சாஹேப். நல்ல காலமாக இருந்தாலும், மோசமான காலமாக இருந்தாலும், ஒவ்வொரு காலகட்டத்திலும் நீங்கள் எப்போதும் எனக்கு ஆதரவாக இருந்தீர்கள்" என்றும் அவர் தெரிவித்துள்ளார்.

விவசாயிகளுக்கான சமூகப் பணி

பட மூலாதாரம், Getty Images

திரைப்படங்களைத் தாண்டியும் நானா படேகர் சமூகப் பணிகளுக்காக அறியப்பட்டார்.

குறிப்பாக விவசாயிகள் மற்றும் வறட்சியால் பாதிக்கப்பட்ட குடும்பங்களுக்கு உதவுவதற்காக செயல்பட்ட 'நாம் ஃபவுண்டேஷன்' அமைப்புடன் அவர் மேற்கொண்ட பணிகளை பல அரசியல் தலைவர்களும் அவரது மறைவுக்குப் பிறகு நினைவுகூர்ந்துள்ளனர்.

தேசியவாத காங்கிரஸ் (சரத் சந்திர பவார்) கட்சியின் தலைவர் ரோஹித் பவார், திரைப்படங்களில் நடித்ததுடன் விவசாயிகள், வறட்சியால் பாதிக்கப்பட்டவர்கள் மற்றும் கிராமப்புற மக்களுக்காக நானா படேகர் ஆற்றிய பணியையும் தனது இரங்கல் செய்தியில் குறிப்பிட்டுள்ளார்.

காங்கிரஸ் கட்சியின் மகாராஷ்டிர மாநில தலைவர் ஹர்ஷவர்தன் சப்கால், நானா படேகரை "சிறந்த நடிப்பு, சமூக அக்கறை மற்றும் மனிதநேயம் கொண்ட உணர்வுபூர்வமான ஆளுமை" என்று நினைவுகூர்ந்துள்ளார்.

மகாராஷ்டிர மாநில கலாசாரத் துறை அமைச்சர் ஆஷிஷ் ஷெலார், "ஒரு கம்பீரமான நடிகரை நாம் இழந்துவிட்டோம்" என்று தெரிவித்ததுடன், நாடகம், திரைப்படம் மற்றும் சமூகப் பணி என வெவ்வேறு துறைகளில் நானா படேகர் தனக்கென அடையாளத்தை உருவாக்கியதாகக் கூறியுள்ளார்.

மகாராஷ்டிர முன்னாள் உள்துறை அமைச்சர் அனில் தேஷ்முக்கும், நானா படேகரின் கம்பீரமான குரல், கூர்மையான பார்வை மற்றும் அழுத்தமான வசன உச்சரிப்பை நினைவுகூர்ந்ததுடன், விவசாயிகளுக்காக அவர் மேற்கொண்ட சமூகப் பணிகளையும் தனது இரங்கல் செய்தியில் குறிப்பிட்டுள்ளார்.

ஹிந்தி மற்றும் மராத்தி சினிமாவில் பல தலைமுறை ரசிகர்களுக்கு வெவ்வேறு முகங்களில் அறிமுகமான நானா படேகர், தமிழ் ரசிகர்களுக்கு 'பொம்மலாட்டம்' நடிகராகவும், குறிப்பாக 'காலா'வில் ரஜினிகாந்தின் கரிகாலனுக்கு எதிராக நின்ற ஹரி தாதாவாகவும் நினைவில் நிலைத்துள்ளார்.

- இது பிபிசிக்காக கலெக்டிவ் நியூஸ்ரூம் வெளியீடு